ម្ទេស​ជួយ​ពន្យារ​ជរា​ភាព

ម្ទេស​មាន​រសជាតិ​ហឹរ​ក្រហាយ​ពិបាក​ទំពារ​ ពិបាក​លេប តែ​នៅ​ខាង​ក្នុង​រស​ជាតិ​ក្រហល់​ក្រហាយ​នោះ មាន​បង្កប់​ទៅ​ដោយ​សារធាតុ​អាហារ​មាន​ប្រយោជន៍​ជាច្រើន ។ ជា​ពិសេស​វាមាន​សារ​ធាតុ​ម្យ៉ាង​ជួយ​ពន្យារ​ជរា​ភាព​ ធ្វើ​អោយ​មនុស្ស​ស្ថិត​នៅក្មេង​វ័យ​បាន​យូរ ។

ម្ទេស​ជា​អាហារ​គួរ​អោយ​ចាប់​អារម្មណ៍​បំផុត

ព្រោះ​បើ​ទោះ​បីជា​ហឹរ​ពិបាក​លេប​ ក៏​នៅតែ​មាន​មនុស្ស​ជា​ច្រើន​និយម​បរិភោគ​វា​ដែរ ។ ម្ទេស​មាន​សារ​ធាតុ​ប្រឆាំង​នឹង​រ៉ាឌីកាល់​សេរី (Free Radical) មាន​បេតា​ខែរ៉ូ​ទីន និង​វីតាមីន C ច្រើន​ជាង​បន្លែ​បង្កា​ទូទៅ ។ ម្ទេស​មាន​អាហារ​សសៃ​ដល់​ទៅ ៩.៩​ ក្រាម ក្នុង​ ១០០ក្រាម ដែល​ជាបរិមាណ​ច្រើន​បំផុតក្នុង​ចំណោម​បន្លែ ដោយ​ចាញ់តែ​ត្រប់​ចង្កោម ម្រះ និង​ស្តៅប៉ុណ្ណោះ ។

លើស​ពីនេះ ម្ទេស​មានសារធាតុ​ដ៍សំខាន់​ម្យ៉ាង​ហៅ​ថា ខែតសៃ​ស៊ីន (Capsaicin) ដែល​​មាន​តួនាទី ជួយ​ពន្យារ​ជរាភាព​ ធ្វើ​អោយ​មនុស្ស​ក្មេងវ័យ រារាំង​អាការរលាក និង​ជួយ​រំញោច​ដល់​ចរាចរ​ឈាម ។

ដូច្នេះ ការ​បរិភោគ​ម្ទេស​មាន​ប្រយោជន៍ ពាក់ព័ន្ធ​ទៅនឹង​រឿងសម្ផស្ស​ដោយ​ផ្ទាល់​ គឺ​វាជួយ​ធ្វើ​អោយ​មនុស្ស​មាន​ភាព​ក្មេង​វ័យ​បានយូរ​ ។ ប៉ុន្តែ​គុណ​វិបត្តិ​របស់​វា​គឺ​ស្ថិត​នៅ​លើ​រសជាតិ​ហឹរ​ ដែល​ពុំ​អាច​អោយ​យើ​ង​បរិភោគ​បាន​ច្រើន ដូច​បន្លែ​ដទៃ​ទៀតនោះឯង ។ ជា​ពិសេស​សម្រាប់​អ្នក​ដែល​មាន​ជម្ងឺ​ក្រពះ ប្រសិន​បើ​បរិភោគ​ម្ទេស​វា​នឹង​ធ្វើ​អោយ​ផ្សា​ក្រពះពុំ​ធម្មតា​ឡើយ ។​ ទោះ​ជាយ៉ាង​ណាក៏ដោយ​គេ​សង្កេត​ឃើញ​ថាអ្នក​ដែល​ចូលចិត្ត​ហូប​ម្ទេស​រមែង​មាន​អាយុ​វែង ។

បច្ចុប្បន្ន​នេះ​ម្ទេស​ត្រូវ​បាន​គេ​ចម្រាញ់​ធ្វើ​ជាប្រេង សម្រាប់​រឹត​លាបមានឈ្មោះ​ថា Capsaicin ជា​ថ្នាំ​ក្តៅសម្រាប់​បំបាត់​ការ​ឈឺ​ចាប់​សន្លាក់ ឈឺចាប់​សាច់ដុំ ។ ដោយសារ​វា​មានគុណ​សម្បត្តិ​ទប់ស្កាត់​ការ​រលាក និង​ជួយរំញោច​ដល់ច​រាចរណ៍ឈាម ទើប​ធ្វើ​អោយ​វា​អាច​ក្លាយ​ជា​ថ្នាំ​ព្យាបាល​ជម្ងឺ​សន្លាក់​ និង​សម្រាល​ការ​ឈឺចាប់​បាន​យ៉ាង​ល្អ ។ 

@បងពេទ្យ