ដំណើរកម្សាន្ត ថ្ងៃពុធ ទី០១ ខែឧសភា ឆ្នាំ២០១៣

ដោយឃើញការសរសេរកំណត់ហេតុរបស់បងៗ មួយចំនួនដែលគាត់សរសេរបានល្អ ជាលក្ខណៈឯកជននិយាយអំពីសកម្មភាព ក៏ដូចជាជីវិតខ្លួនឯង បងពេទ្យក៏សាករៀនសរសេរកំណត់ហេតុខ្លះៗនឹងគេ ។ បងពេទ្យគ្រាន់ចង់ដឹងថាការសរសេររបស់បងពេទ្យមានស្នាដៃកម្រិតណាដែរ ។ កំណត់ហេតុដំបូងរបស់បងពេទ្យ ក៏សូមនាំបងប្អូនអ្នកនិយមចូលទស្សនាគេហទំព័របងពេទ្យ ដឹងពីសកម្មភាពរបស់បងពេទ្យក្នុងការដើរកម្សាន្តក្នុងថ្ងៃឈប់សម្រាក គឺថ្ងៃពុធ ទី០១ ខែឧសភា ឆ្នាំ២០១៣ ដែលជាថ្ងៃទិវាពលកម្មអន្តរជាតិ ដែលតម្រូវអោយសិស្សានុសិស្ស ក៏ដូចជាមន្ត្រីរាជការនៅប្រទេសកម្ពុជាបានសម្រាក ។

@មុនថ្ងៃដើរកម្សាន្ត

ដោយនៅប្រទេសវៀតណាម ត្រូវបានឈប់សម្រាកចំនួន២ថ្ងៃ គឺថ្ងៃទី៣០ ខែមេសា ជាថ្ងៃដែលបង្រួបបង្រួមវៀតណាមទាំង២ (ខាងជើង និងខាងត្បូង) និងថ្ងៃទី០១ខែឧសភា ជាថ្ងៃនៃទិវាពលកម្មអន្តរជាតិផងនោះ ម្យ៉ាងដោយថ្ងៃឈប់នោះចំថ្ងៃដែលខ្ញុំត្រូវរៀនរាល់អាទិត្យផង បងពេទ្យក៏សម្រេចចិត្តថាទៅខ្មែរដើម្បីទៅលេងបងប្អូន ជាពិសេសគឺម៉ាក់ប៉ា ដែលសរុបថ្ងៃដែលបានឈប់ គឺ១០ថ្ងៃដែរ ។

@សម្រេចជ្រើសយកថ្ងៃទី០១សម្រាប់ដើរលេង

ក្រោយពីបានទៅដល់ស្រុកកំណើត ខ្ញុំបានជួបជុំបងប្អូននៅឯក្រុងកំពង់ចាម ។ យប់ថ្ងៃដែលខ្ញុំបានទៅដល់ ពួកយើងនាំគ្នាទៅញ៉ាំស៊ុប (ទាយមើលថាអ្នកណាជាអ្នកចេញលុយ???) ។ សួរបែបហ្នឹង ប្រហែលជាខ្ញុំហើយ ការពិតគឺខ្ញុំជាអ្នកមកពីឆ្ងាយត្រូវប៉ាវបងប្អូនខ្ញុំ ដែលកាលនោះ មានគ្នាច្រើនគួរសមដែរ ប្អូនបង្កើត២នាក់ ប្អូនជីដូន១ ២នាក់ទៀត ថែមបងស្រីជីដូនមួយ ១នាក់ ។ សរុបទាំងខ្ញុំ គឺ៦នាក់ល្មម ។ ពួកយើងនាំគ្នាផឹកបន្តិច និងញ៉ាំស៊ុប ។ ក្រោយពីញ៉ាំហើយ ពេលជិះតាមផ្លូវក៏ចែកគ្នា២នាក់ម៉ូតូ អោយទៅទិញ ស្រា ងាវឆាអំពិលទុំ និងទឹកកក ដើម្បីផឹកបន្ត អបអរដែលខ្ញុំទៅខ្មែរ តែលុយចំណាយលើការផឹកស៊ី គ្មានអ្នកណាក្រៅពីខ្ញុំនោះទេ (បងពេទ្យ) ។ យប់ណាស់ដែរ ប្រហែលម៉ោង៨ ខ្ញុំនឹងបងប្អូនខ្ញុំនាំគ្នាផឹក ក្លែមជាមួយងាវឆាអំពិលទុំ ដែលខ្ញុំមិនបានញ៉ាំសោះនៅវៀតណាម ។ ដោយម្នាក់តម្រូវអោយផឹកចំនួន២កំប៉ុង (ដឹងថាស្រាបៀរអីទេ???) គឺស្រាបៀរជាតិ មោទនភាពជាតិនោះអី Cambodia Beer ។ មានមោទនភាពណាស់ដែលល្បីខាងស្រាបៀរហ្នឹង ខ្មែរយើង មិនដឹងថារាល់ថ្ងៃផលប៉ះពាល់នៃការផឹកស្រាបៀរមានអ្វីខ្លះទេ បានជាមានមោទនភាពដល់ម្លឹង ហ៊ឺម..... ។ ផឹកស៊ីតែប្រហែលជា១ម៉ោងប៉ុណ្ណោះ ពួកយើងសម្រេចសម្រួលនឹងគ្នាថា នឹងជ្រើសរើសយកថ្ងៃទី០១ខែឧសភា ជាថ្ងៃដើរលេងកម្សាន្តទាំងអស់គ្នា ព្រោះជាថ្ងៃដែលបងប្អនខ្ញុំទាំងអស់គ្នា ឈប់សម្រាក ។ ផុតពីនោះមកពួកយើងក៏ចូលសម្រាករៀងខ្លួនទៅ ........ ក្រកៗៗៗ (ដេកស្រម៉ុក ព្រោះស្រវឹងហើយ )

@ការគិតមិនដូចបំណង

ខ្ញុំគិតថាមកខ្មែរម្តងនេះ នឹងបានដើរលេងជុំបងប្អូនមិនខានទេ តែផ្ទុយស្រឡះ គ្មានអ្នកណាទៅ ទៅវិញ ។ ឈឺចិត្តណាស់ គិតថាថ្ងៃក្រោយនឹងលែងមកខ្មែរទៀតហើយ ។ និយាយគ្នាថាទៅ ដល់ចុងក្រោយទៅតែប្អូនប្រុសបង្កើតម្នាក់ ។ ក្តៅចិត្តឆេវម៉ង !!!! ចាំមើលខ្ញុំនិយាយប្រាប់ ប្អូនស្រីបង្កើតនោះ មកដល់បែកអន្លូងហើយ ដំបូងថាទៅស្រាប់តែព្រឹកឡើងកិចកុកថា មិនទៅទេព្រោះថ្ងៃស្អែកត្រូវចូលរៀន ចឹងចង់ទៅកំពង់ចាមវិញល្ងាច ។ នាងមិនព្រមទៅដោយសារល្ងាចពួកខ្ញុំត្រូវចូលញ៉ាំការអ៊ីម្នាក់ដែលគាត់រៀបការប្តីថ្មី ។ ដល់ប្អូនប្រុសជីដូនមួយវិញ ដឹងគេថាម៉េចហ្អេ??? គេថាគេពុលឡានមិនអាចទៅបានទេ ចប់!! មួយទៀត ។ ដល់ប្អូនស្រីជីដូនមួយវិញ ល្ងាចហ្នឹងថាមកហើយស្រាប់តែមិនមកវិញ ហួសចិត្តម៉ង ។ រឿងបងប្អូនហ្នឹងមួយឡែក រឿងប៉ានិងចែបង្កើតខ្ញុំ ជារឿងផ្សេងទៀត ។ ខ្ញុំចង់ដើរលេងជុំទាំងអស់គ្នា តែមិនចឹងអី ប៉ាខ្ញុំថា បើពួកហ្គារ៉ាសទៅ គាត់មិនទៅទេ ហើយគាត់ទៅ ទាល់តែពួកហ្គារ៉ាសមិនទៅ ។ មានន័យថាការដើរលេងដែលមិនជុំបងប្អូន ដល់ពេលដឹងថាបែបហ្នឹង ខ្ញុំលែងចង់ដើរលេងទៅណាទាំងអស់ តែជ្រុលនិយាយជាមួយប៉ាទៅហើយ ក៏សម្រេចចិត្តថាទៅ ។ អូ!!! ភ្លេចប្រាប់ទីតាំងដែលទៅដើរកម្សាន្តគឺ ព្រែកកាំពី នៅខេត្តក្រចេះ

@ទិន្នន័យអ្នកទៅដើរលេង ក្រោយពីការសម្រេចចិត្ត

ចុងក្រោយអ្នកដែលចូលរួមក្នុងកម្មវិធីដើរកម្សាន្តទៅព្រែកកាំពី រួមមាន បងពេទ្យ ម៉ាក់ ប៉ា ប្អូនប្រុសបង្កើត ក្មួយប្រុសបង្កើត បញ្ញារាជ អាយុ១ខួប៨ខែ អ៊ីម្នាក់ជាអាជីវករលក់ឌីសនៅមុខផ្សារបែកអន្លូង និងកូនស្រីគាត់ ។ ផ្សារបែកអន្លូងដែលស្ថិតនៅក្នុងភូមិបែកអន្លូង ឃុំអារក្សត្នោត ស្រុកស្ទឹងត្រង់ ខេត្តកំពង់ចាម ជាផ្សារដែលធ្វើឡើងដោយលោកប៉ាខ្ញុំ ហើយគាត់បានដាក់ឈ្មោះថា ផ្សារសែនមនោរម្យ ។ មនោរម្យ??? គឺត្រជាក់ត្រជុំនោះអី ផ្សារដែលផ្តល់សេចក្តីសុខសប្បាយ ដល់បងប្អូនអាជីវករគ្រប់គ្នា ។

@ការរៀបចំមុនពេលចេញដំនើរ

បើនិយាយមុនពេលចេញដំនើរវិញ ពួកយើងត្រូវរៀបចំឥវ៉ាន់ច្រើនណាស់ ច្រើនជាងគេគឺពេលវេលា ព្រោះម៉ាក់ខ្ញុំជាអ្នកយកភាស៊ីផ្សារផ្ទាល់ ដូច្នេះរៀងរាល់ព្រឹកគាត់ត្រូវងើបឡើងសំអាតផ្ទះហើយ រួចទៅយកភាស៊ី ប្រហែលម៉ោង៨បានរួចរាល់ចប់សព្វគ្រប់ ។ ប្រហែលជាម៉ោង៨ជាង ពួកយើងឡើងឡានធ្វើដំណើរ ហេហេ នៅវៀតណាមមិនបានជិះឡាន ដល់ពេលទៅខ្មែរបានជិះឡានហើយ តែត្រូវអង្គុយខាងក្រោយ ព្រោះត្រូវទុកអោយម៉ាក់ខ្ញុំអង្គុយខាងមុខ ។ អង្គុយខាងក្រោយទៅ បងពេទ្យអើយ !!

@ការធ្វើដំនើរ

ការធ្វើដំនើរចំនាយពេលប្រហែលជា២ ទៅ៣ម៉ោងប៉ុណ្ណោះ ដែលពួកយើងចេញពីផ្សារបែកអន្លូងតាមផ្លូវព្រែកសង្កែ រហូតដល់ពាមកោះស្នា ដែលជាស្រុកកំណើតរបស់សម្តេចតេជោសែន ។ ហើយបន្តដល់កំពង់គរ ទើបយើងឆ្លងកំពង់ដរ ទៅត្រើយម្ខាងដែលជាស្រុកឆ្លូងខេត្តក្រចេះ ។ ក្នុងពេលជិះដរ ក្មយប្រុសខ្ញុំ បញ្ញារាជ វាហ្នឹងចូលចិត្តទឹកណាស់ ស្រែកតែទឹកៗៗៗ មិនដាច់ទេ ក្បាលខូច៩ ចង់ចុះហែលទឹកទៀត ។ ថ្ងៃក៏ក្តៅ ឯអារម្មណ៍ក៏មិនល្អ ព្រោះមកខ្មែរមិនបានដើរលេងជុំបងប្អូន ណាមួយមិនស្រួលខ្លួនទៀត ជិះឡានប៉ុន្មានថ្ងៃហ្នឹង រកតែពុល ។ ឡើងដរត្រង់ស្រុកឆ្លូងភ្លាម សុំទ្រីដេកសិនហើយលោកប៉ា ព្រោះកូនពុលងើបមុខលែងរួចហើយ ប៉ាបើកឡានចុះ ចាំកូនដេកមើលអោយ ។ មិនយូរប៉ុន្មាន ឡានក៏បានទៅដល់ព្រែកកាំពី ដែលជាទីរមណីយដ្ឋានដ៏ប្រណីត មានទឹកហែលលេង ហើយក្បែរនោះ មានអន្លង់សត្វផ្សោតទៀតផង ។ តែស្តាយណាស់ដែលមិនបានទៅមើល ណាមួយប្រហែលជាពិបាកមើលផង ។ អ៊ីចឹងកុំមើលអី ហេហេ ។

ឃិន ជាឆាយ ប្អូនប្រុស

@រៀបចំឥវ៉ាន់លេងទឹក
ដល់វគ្គបងពេទ្យ ចុះទៅលេងទឹកហើយ ។ និយាយពីឥវ៉ាន់វិញ ស្ពាយផងយូរផង កណ្តៀតផង ព្រោះយើងនៅក្មេង ហើយអ្នកទៅជាមួយសុទ្ធតែជាមនុស្សចាស់ៗ ប៉ាម៉ាក់ អ្នកណាទៅហ៊ានអោយគាត់លើកទៅ មែនហ្អេ??? ខ្ញុំនិយាយត្រូវហ្ន !!! ហាហា ដើរឆ្លងកាត់ស្ពានម្នាក់ ៥០០រៀល ដើរទៅម៉ាស្រឡាញ់ ចង់មិនដើរកាត់ស្ពានក៏បាន ព្រោះយកលុយហើយ ហូហូ ទឹកក៏ហូរខ្លាំង ថតបាន ប្អូនប្រុសមួយ ដើរយូរឥវ៉ាន់ដែរ ។ ប្អូនប្រុសខ្ញុំសម្បូរខ្មៅជាងខ្ញុំហើយ ហាហា អ៊ួតខ្លួនឯងបន្តិចសិន មកពីខ្ញុំសង្ហាជាងនោះអី ។ តែបើមន្តស្នេហ៍ ចាំឆាយដាច់ ។ មួយស្របក់ក្រោយពួកយើងបានរកបានកន្លែងសមរម្យអាចសម្រាកលេងទឹកនិងញ៉ាំអាហារបាន ក៏ដាក់ឥវ៉ាន់ចុះ ហើយផ្លាស់សម្លៀកបំពាក់លេងទឹក យូៗៗ យ៉ាៗៗៗ បានលេងទឹកហើយ ចាំមើលដឹងតែខ្មៅស្គុះមិនខានទេ ។ ណ្ហើយយូរៗមកម្តង លេងអោយណាណីម្តង ....

@លេងទឹកនិងញ៉ាំបាយ
ផ្លាស់ខោអាវហើយ ចាំអីទៀត លេងទឹក ហាហា ហូរខ្លាំងណាស់ ទប់ខ្លួនសឹងតែមិនជាប់ ឯកន្លែងលេងហ្នឹង មានថ្មទៀត ស្រួចៗល្អ៩ ក្តៅក៏ក្តៅ លឿនក៏លឿន លេងតែម៉ាកន្លែង ហ៊ឺម..... គ្មានសង្សារណាមកអង្គុយប្រលែងលេងហ្នឹងគេ ចង់យំ ហ៊ីៗៗៗ ។ ថតបានរូបថត២ ៣ប៉ុស្តិ៍ដែរ អ៊ែមម៉ង ។ ដល់ពេលញ៉ាំបាយបានមកដល់ ខានបានញ៉ាំម្ហូបខ្មែរយូរហើយ ប៉ងតាំងពីវៀតណាមថាតែទៅ ញ៉ាំអោយឆ្អែតចិត្តម៉ង ។ ថ្ងៃនោះ មានសាច់មាន់ដុត ត្រី សម្លអីគេទេ មិនសូវដឹងអារឿងមុខម្ហូបទេ តែចង់ប្រាប់ថាឆ្ងាញ់ ។ ម៉ាក់ថាអ្ហែងត្រូវតែស៊ីអោយអស់ ខំទិញអោយញ៉ាំហើយ ហើយបើមកមិនលេងទឹកទេ ដឹងតែត្រូវហើយ ។ រឿងអីមិនត្រូវ បើគាត់សុខចិត្តចំណាយពេលវេលារបស់គាត់មកដើរលេងជាមួយខ្ញុំ ពេញមួយថ្ងៃ ។ ចង់ប្រាប់ថាខ្ញុំស្រឡាញ់គ្រួសារខ្ញុំណាស់ ជាពិសេសគឺម៉ាក់ប៉ាខ្ញុំ ។ ពួកគាត់តែធ្វើអ្វីៗ គ្រប់បែបយ៉ាងដើម្បីខ្ញុំ ។

@ទៅលេងវត្តព្រះវិហារធំសសរ១០០
ញ៉ាំបាយហើយ រៀបចំឥវ៉ាន់ទុកដាក់ឡើងឡានដ៏សែនក្តៅដែលពេលទុកនៅក្រោមម្លប់ តែ៣ម៉ោងក្រោយក្លាយជាវាលដ៏សែនក្តៅងុំ ដូចភ្លើង ។ ឡើងឡានរួចពួកយើងបន្តទៅលេងវត្តព្រះវិហារសសរ១០០នៅស្រុកសម្បូរ ដែលនៅចម្ងាយប្រមាណជា២០គីឡូម៉ែតទៀតទៅពីព្រែកកាំពី ។ ប្រហែលជាកន្លះម៉ោងយើងទាំងអស់គ្នាបានទៅដល់វត្តដូចក្តីប្រាថ្នា ដែលខ្ញុំទទួលតួនាទីដេកមើលផ្លូវ ហាហា (ពុលខ្លាំងមែនទែនហើយ បងពេទ្យ)

@អុជធូបថ្វាយបង្គំព្រះ និងថតរូប
ចុះពីលើឡានទាំងញើសជោគរូបផ្សំ និងហ្សើៗ ដោយពុលឡាន ខ្ញុំរូតរះ កាន់កាមេរ៉ាទូរស័ព្ទ និងកាមេរ៉ាវីដេអូ ដើរថត តាមការចង្អុលរបស់លោកប៉ា ។ ខ្ញុំថតបានច្រើនគួរសមដែរ ។ នេះជារូបព្រះវិហារសសរ១០០ ដែលពីមុនធ្លាប់តែលឺ មិនដែលបានមកដល់នោះទេ តែពេលនេះ បានមកដល់ហើយ សប្បាយចិត្តណាស់ ។ អរគុណលោកប៉ាខ្លាំងណាស់ ។ ពួកយើងក៏ចូលទៅក្នុងព្រះវិហារអុជធូបថ្វាយបង្គំព្រះ ។ ប៉ាម៉ាក់ខ្ញុំ គាត់ចាក់គម្ពីរ ខ្ញុំនិងប្អូនខ្ញុំបានត្រឹមតែអង្គុយមើល ព្រោះមិនចេះចាក់អីនោះទេ ។ នៅក្នុងវត្តប្រហែលកន្លះម៉ោង ពួកយើងចេញដំនើរត្រលប់មកវិញ ដែលដល់វេនដែលខ្ញុំត្រូវបើកឡានហើយ ។ សប្បាយចិត្តមែនទែនដែលបានបើកឡាន ព្រោះថា បើបងពេទ្យមិនបើកទេ និងពុលធ្វើអីមិនកើតទេ ។ បើកឡាន៣ម៉ោង ប្រហែល១២០គីឡូម៉ែត្រ អីយ៉ាមិនដែលបើកបែបនេះទេ ។ តែមានអារម្មណ៍ថាសប្បាយចិត្ត ពួកយើងត្រូវចូលរួមមង្គលការចាស់ៗ ដែលគាត់យកគ្នាជាប្តីប្រពន្ធ នៅឯស្រុកក្រូចឆ្មារ ។ ទៅដល់រោងការ ប្រហែលម៉ោង៥ជាង ។ ញ៉ាំម្ហូបទៀតហើយ តែមិនសូវឃ្លានទេ ឃ្លានជាងគេ គឺរាំ ។ បងពេទ្យចូលចិត្តរាំណាស់ ។ សំណាងដែរដែលមានបងជីដូនមួយនៅទីនោះដែរ ខ្ញុំហៅ តែអាខ្លាទេ ព្រោះគាត់ឈ្មោះតុលា ។ ម៉ោង៦ជិត៧ ដល់ពេលត្រូវទៅបែកអន្លូងវិញ ព្រោះថាកំពង់ដរ ភូមិទ្រា ទៅស្ទឹងត្រង់ ពេលយប់គេមិនចម្លងទេ តែដោយសារអ្នកទៅញ៉ាំការមានចំនួនច្រើនដូច្នេះ ក៏គេសុខចិត្តមកចម្លងយើងទៅ ។

មួយថ្ងៃដែលពេញទៅដោយក្តីសុខ សប្បាយរីករាយ ស្នាមញញឹមលាយការពុលឡាន ធ្វើអោយខ្ញុំចងចាំមិនភ្លេចនូវថ្ងៃដែលលោកប៉ា និងអ្នកម៉ាក់ខ្ញុំចំណាយពេលវេលានាំខ្ញុំទៅដើរលេង ។ កូនសូមអរគុណលោកទាំងពីរជាខ្លាំងដែលតែងតែយកចិត្តទុកដាក់និងកូនកន្លងមក និងទៅអនាគតក៏នៅតែបារម្ភដែរ ។ សូមវត្ថុសក្តិសិទ្ធិលើលោកអ្នកជួយអោយលោកទាំងពីរមានសេចក្តីសុខសេចក្តីចម្រើន នៅជាម្លប់ដ៏ត្រជាក់សម្រាប់កូនៗគ្រប់ៗគ្នា ។ កូនស្រឡាញ់គ្រួសារយើង

--------------------------------------------------------

ថៃប៊ិញ ថ្ងៃព្រហស្បតិ៍ ទី២៣ ខែឧសភា ឆ្នាំ២០១៣

@បងពេទ្យ@

ពេទ្យខ្មែរ